🔰- බාලවයස්කාර දැරියක බරපතළ ලෙස ලිංගික අපයෝජනයට ලක්කළ බවට චෝදනා ලබා සිටින අනුරාධපුර හිටපු අටමස්ථානාධිපති පල්ලේගම හේමරතන හිමියන් අධිකරණ සංකීර්ණ භූමියට ඇතුළු වූ සැකසහිත ආකාරය පිළිබඳව වහාම පරීක්ෂණයක් පවත්වා වාර්තාවක් ඉදිරිපත් කරන ලෙස අනුරාධපුර ප්රධාන මහේස්ත්රාත් සියපත් සසිදු වික්රමරත්න මහතා ක්ෂණික නියෝගයක් නිකුත් කර තිබේ.
🔰- මෙම ප්රකාශ නියෝගය අධිකරණ සංකීර්ණයේ පොලිස් ආරක්ෂක ඒකකයේ ස්ථානාධිපති, ප්රධාන පොලිස් පරීක්ෂක ජී. ධර්මසිරි මහතා වෙත සෘජුවම ලබා දී ඇත.
🔰- මෙම අතිශය ආන්දෝලනාත්මක නඩුව අගෝස්තු 21 වනදා අනුරාධපුර මහේස්ත්රාත් අධිකරණයේදී කැඳවූ අවස්ථාවේදී, ජාතික ළමාරක්ෂක අධිකාරියට මුල් පැමිණිල්ල ඉදිරිපත් කළ මාධ්යවේදී බිමල් රුහුණගේ මහතා වෙනුවෙන් පෙනී සිටි නීතිඥ චානක අබේවික්රම මහතා විසින් මෙම බරපතළ තත්ත්වය අධිකරණය හමුවේ අනාවරණය කරන ලදී.
🔰- සාමාන්ය මහජනතාව දැඩි ලෙස පරීක්ෂාවට ලක්කර ඇතුළු කරගන්නා ප්රධාන දොරටුව මුළුමනින්ම මඟහැර, විනිසුරුවරුන් සඳහාම පමණක් වෙන්වූ විශේෂ දොරටුවෙන් සැකකාර හිමියන් සුඛෝපභෝගී මෝටර් රථයකින් අධිකරණ භූමියට ඇතුළු වී ඇති බව නීතිඥවරයා මෙහිදී තදින්ම පෙන්වා දුන්නේය.
🔰- තවද, සැකකාර හිමියන් තමන් වෙනුවෙන් පෙනී සිටින ජනාධිපති නීතිඥ කාලංග ඉන්ද්රතිස්ස මහතාගේ වාහනයෙන් මීට පෙර අවස්ථාවකදීද මෙම විශේෂ දොරටුවෙන්ම අධිකරණයට ඇතුළු වී ඇති බවට නීතිඥවරයා මෙහිදී චෝදනා කළේය.
🔰- නීතිය හමුවේ සැවොම එක හා සමාන විය යුතු බවත්, කිසිදු පරීක්ෂාවකින් තොරව මෙලෙස විශේෂ වරප්රසාද ලබා දෙමින් සැකකාර හිමිනම අධිකරණයට ඇතුළු කරගැනීම සම්බන්ධයෙන් පොලිසිය සම්පූර්ණ වගකීම භාරගත යුතු බවත් නීතිඥවරයා වැඩිදුරටත් අවධාරණය කළේය.
🔰- ඉදිරිපත් වූ කරුණුවල ඇති බරපතළකම සැලකිල්ලට ගත් ප්රධාන මහේස්ත්රාත්වරයා, පොලිස් ආරක්ෂක ඒකකයේ ස්ථානාධිපතිවරයා වහාම විවෘත අධිකරණයට කැඳවා අදාළ සිදුවීම සම්බන්ධයෙන් කඩිනම් විමර්ශනයක් පවත්වා වාර්තාවක් ඉදිරිපත් කරන ලෙස අණ කළේය.
🔰- විශාල කතාබහක් නිර්මාණය කර ඇති මෙම සිද්ධියට අදාළ නඩුව නැවත 2027 ජනවාරි 08 වනදා කැඳවීමට අධිකරණය නියම කළේය.